32. Kontzertua

Ukaezina da Goetheren literaturak eragin handia izan duela literaturaren eta beste arte batzuen historian, hala nola pinturan eta musikan.

Egitarau hau prestatzean, ikusarazi nahi izan dugu nolako lorratza utzi duten musikaren historian bere emakumezko lau pertsonaiek: “Fausto” obrako Margaritak, “West-östlicher Divan” obrako Suleikak, “Wilhelm Meisters Lehrjahre” obrako Mignonek eta “Die Leiden des jungen Werthers” obrako Charlottek.

Hainbeste dira lau pertsonaia liluragarri horiei buruzko musika idatzi duten egileak (Schubert, Schumann, Berlioz, Wagner, Verdi, Mayerbeer, Loewe, Hensel, Mendelssohn, Thomas, Lang, Tchaikovsky, Pedrell, Massenet, Wolf, Berg, Grieg, Strauss, Spohr, White, Liszt, Boulanger eta abar luze bat), non piezak aukeratzea izan baita beharbada zeregin zailena, pieza horien bitartez ager zedin nolabaiteko koherentzia eta oreka figura femenino horien profiletan, eta baita ere argi gera zedin euren unibertsaltasuna ahalik eta konpositore, testu, hizkuntza eta garai desberdin gehien bilduz.

Zalantzarik gabe, Goetheren pertsonaia femeninoak garaiko konbentzialismo sozialen eta eguneroko bizitzaren ondorio eta biktima izaten dira sarri. Goethek kontraesan handiekin bizi zituen bere jarduera politiko, zientifiko eta literarioa.

Beti nahi izan zuen bere bizitza pribatua babestu eta bizitza publikotik bereizi, eta emakumeen paperean aurkitu zuen etxeko intimitatearen babesleku eta abaroa, aterpe baketsu bat, espazioa ematen ziona sorkuntzarako, arterako, humanitaterako, inozentziarako, sentsibilitaterako eta maitasunerako.