Peter Phillips Errenazimentuko polifonia ikertzen eta interpretatzen eta sonoritate korala hobetzen aritu da bere ibilbide osoan. 1973an sortu zuen The Tallis Scholars taldearekin 2.500 kontzertu baino gehiago eskaini ditu, eta 60 disko ingurutan hartu du parte, mundu osoan. Konpromiso horren ondorioz, Peter Phillipsek eta The Tallis Scholars taldeak beste edozein taldek baino neurri handiagoan kokatu du Errenazimentuko erlijiozko ahots-musika mendebaldeko musika klasikoaren errepertorio handien artean.
Beste talde espezializatu batzuk ere zuzendu izan ditu, besteak beste: BBC Singers taldea, Herbehereetako Ganbera Abesbatza, Estoniako Orkestra Filarmonikoko Ganbera Abesbatza, Moskuko Intrada taldea eta Espainiako El León de Oro. Halaber, Merton College Oxfordeko kaperako abesbatzako patronoa da.
Zuzendari-lanetan ez ezik, idazle gisa ere nabarmendu da Peter Phillips. 33 urtez, musika-zutabe bat idatzi zuen, aldizka, The Spectator aldizkarian, eta 1995ean The Musical Times aldizkariko editore-kargua bete zuen —oraindik ere martxan dagoen munduko musika-aldizkaririk zaharrena da—. Phillipsen lehen liburua («English Sacred Music», 1549-1649) Gimell-ek argitaratu zuen 1991n, eta bigarrena («What We Really Do»), berriz, 2013an plazaratu zen. 2018. urtean, BBC Radio 3k tarte bat eskaini zion, eta Errenazimentuko polifoniaren inguruan zuen ikuspegian sakondu zuen bertan —ordubeteko sei kapitulu izan ziren, «Polifoniaren loria» izenekoak—.
2005.urtean, Peter Phillips Chevalier de l’Ordre des Arts et des Lettres izendatu zuen Frantziako Kulturako ministroak. 2008an, Merton College Oxfordeko kaperako abesbatza sortzen lagundu zuen; bertan, Bodley klubeko kidea da. 2021ean, berriz, Oxfordeko St John’s Collegeko ohorezko kide izendatu zuten.
