César Coca

César Coca, Bilbon jaioa, kazetaritzan doktorea da Euskal Herriko Unibertsitatean, eta informazio-zientzietan eta zientzia politikoetan eta soziologian lizentziaduna Madrileko Complutense Unibertsitatean.
El Correo egunkarian egin du bere ibilbide profesionala. Gaur egun, egunkari horretako zuzendari laguntzailea da, eta Territorios gehigarriaren eta El Correok EHUrekin batera antolatzen duen Multimedia Kazetaritza Masterraren arduraduna. Hogeita hiru urte daramatza kulturarekin lotutako gaiak lantzen, eta, denbora horretan, ehunka erreportaje eta elkarrizketa egin ditu, musika klasikoa eta literatura eta diziplina artistiko desberdinen arteko loturak hizpide harturik. 2006an Miguel de Unamuno Saiakera Saria irabazi zuen García Márquez canta un bolero liburuarekin; musikak Nobel saridun kolonbiarraren bizitzan eta obran izan duen garrantzia eta lekua aztertu zuen bertan. 2018an, Euskal Kazetaria saria jaso zuen Euskal Kazetarien Elkartearen eta Kazetarien Euskal Elkargoaren aldetik. EHUko irakasle titularra da, eta Divergencias blogaren arduraduna. Bertatik, liburu bat eta obra musikal bat gomendatzen ditu astero-astero, irakurri eta entzun nahi dituen edonoren gozamenerako. Dagoeneko aipatu dugun García Márquez canta un bolero liburuaz gain, hauek ditu argitaratuak: Entrevista con la cultura eta Guggenheim, el amigo americano, azken hori Bridge/Zubia: imágenes de la relación cultural entre el País Vasco y EEUU liburuaren barruan.