«Bilboko Koral Elkarteak (…) erakutsi zuen gogotik prestatu eta barneratu zuela obra, baita adierazkortasun sendoz jantzi ere»
(Scherzo, 2025-06-21)
Bilboko Koral Elkartea 1886an sortu zen, eta Espainiako instituzio musikalik itzaltsuenetakoa da. Enrique Azurza zuzendari artistikoak gidaturik, hiru abesbatza elkartzen ditu —helduak, gazteak eta haurrak—, baita musika irakasteko zentro bat eta Eskolan Kantari sarea ere, mila partaiderekin baino gehiagorekin. Estatuko eta nazioarteko orkestra nagusiekin jardun du elkarlanean, eta askotariko obrak interpretatu ditu, hala nola Usandizagaren Mendi Mendiyan, Brittenen War Requiem, Theodorakisen Zorba greziarra, Prokofieven Alexander Nevsky eta Orffen Carmina Burana. Emanaldirik berrienen artean, Ligetiren Requiem lana nabarmentzen da, Espainiako Orkestra eta Abesbatza Nazionalekin jokatua, baita Zubiaurreren Pasioa ere, Erroman, Madrilen eta Bilbon aurkeztua. Konprometiturik dago euskal musikarekin, eta lankidetza estua du Bilbao Orkestra Sinfonikoarekin eta Euskadiko Orkestra Sinfonikoarekin. Arte Ederretako Urrezko Domina, San Fernando Errege Akademiaren Ohorezko Domina eta Bilboko Hiribilduaren Urrezko Domina eskuratu ditu Bilboko Koral Elkartearen lanak.
