Hogei urte baino gehiago dira London Handel Players taldeak 2000. urtean Londresko Handel Jaialdian St. George’s Hanover Square elizan debuta egin zuenetik. Haendel eliza horretara joaten zen, eta organoa jotzen zuen bertan.
Geroztik, taldeak mundu osoko entzuleak hunkitu ditu bere emanaldi eta grabazioekin. New York Times-ek taldearen «sakontasun hunkigarria» eta «trebetasun eta maisutasun musikal bikaina» goraipatu ditu, eta taldeak Erresuma Batuko zein nazioarteko leku eta jaialdi nagusietan jo ohi du. Ganbera-musikan eta kontzertu barrokoetan espezializatuta dago, eta kolaborazioak egiten ditu munduko kantaririk garrantzitsuenetako batzuekin.
Egin dituen azken biretan, Ipar Irlandan, Espainian, Turkian, Kanadan eta Estatu Batuetan jo du London Handel Players taldeak. Bereziki aktiboa izan da Ipar Amerikan. Izan ere, Frick Museoan, Carnegie Hall-en eta Montrealgo Bourgie Hall-en jo du, besteak beste. 2023-2024 denboraldian Londresko Wigmore Hall-era itzuliko da Bachen kantata sorta batekin; Bachen, Vivaldiren eta Telemannen instrumentu anitzeko kontzertu batzuekin eta, Alexander Chance kontratenor gazte eta liluragarriarekin batera, Handel/Vivaldiren programa batekin.
Somm Recordings enpresak bi grabazio berri atera zituen: Bachen teklaturako eta biolinerako sonata bat eta Handelen aria batzuen moldaketa bat (2023an), «Total Eclipse» izenekoa. Taldearen diskografia goraipatuaren barruan, Haendelen ganbera-musikaren lau edizio ditugu: Op. 2 eta Op. 5 sonatak hirukoteentzat, biolin-solorako obra osoa eta «Haendel at Home» izeneko diskoa. Horiez gain, Francesco Geminiani-ren Op. 1 sonata osoak eta Joan Sebastianen bi disko grabatu dituzte. Halaber, aipagarriak dira Bachen txirularako sonatak eta, haiekin tartekatuta, haren kantaten txirularako aria batzuk, Elizabeth Cragg, Charles Daniels eta Peter Harvey kantariek interpretatuak. Etorkizuneko lanetan, Vivaldiren txirularako eta txirula eztirako kontzertuen grabazio bat eskainiko dute.
Taldeko kideak bakarlari, zuzendari eta orkestra-zuzendari aritzen dira, antzinako instrumentuen talde nagusi askorekin egiten dute lan Erresuma Batuan eta atzerrian, eta irakasleak dira Londresko kontserbatorioetan. Maila guztietan konprometitutako hezitzaileak dira, eta eskola magistral eta lantegi ugari eskaintzen dituzte ikasleentzat, zale gogotsuentzat eta haurrentzat.
