The Tallis Scholars taldea 1973an sortu zuen Peter Phillips zuzendariak. Grabazio eta kontzertuen bidez, Errenazimentuko erlijio-musikaren adierazgarri nagusi bihurtu da mundu osoan. Peter Phillipsek Errenazimentuko errepertoriora ondoen egokitzen den soinuaren garbitasuna eta argitasuna sortzeko lanean aritu da taldearekin. Eskaintzen duen soinuaren edertasunari esker da hain ezaguna The Tallis Scholars taldea.
Leku sakratu zein sekularretan aritzen da, eta, oro har, 80 kontzertu inguru ematen ditu urtero mundu osoan. 2013. urtean, 40. urteurrena ospatzeko, World Tour bat egin zuen taldeak: guztira 99 emanaldi eskaini zituen 16 herrialdetako 80 lekutan. 2020. urtean, Gimell Recordsek taldearen grabazioen 40 urteak ospatu zituen, eta Allegriren «Miserere» obraren 1980ko grabazioaren bertsio birmasterizatua atera zuen. COVID-19aren krisiaren ondorioz emanaldiak bertan behera geratzen hasi ziren arte, The Tallis Scholars taldeak 2.500 emanaldi zituen eskainiak mundu osoan.
2024-2025 denboraldian, Europako eta Erresuma Batuko ohiko programa betetzeaz gain, Japonian, AEBn, Asiako ekialdean eta Londresen arituko da.
The Tallis Scholars taldearen grabazioek sari ugari jaso dituzte mundu osoan. 1987. urtean, Josquinen «Missa La sol fa re mi» eta «Missa Pange lingua» obren grabazioak Gramophone aldizkariaren Record of the Year saria jaso zuen, eta sari gutiziatu hori irabazi duen antzinako musikako lehen grabazioa da. 1989. urtean, Frantziako Diapason aldizkariak Lassusen meza baten eta motet batzuen grabazioak eta «L’Homme armé» abestian oinarritutako Josquinen bi mezen grabazioak saritu zituen bere Diapason d’Or de l’Année sarietako birekin. Era berean, Palestrinaren «Missa Assumpta est Maria» eta «Missa Sicut lilium» obren grabazioak Gramophone aldizkariaren Early Music Award saria jaso zuen 1991. urtean, eta sari hori bera jaso zuen, 1994an, Cipriano de Rore-ren musikaren grabazioagatik, eta 2005ean John Browne-ren musikarekin egindako diskoagatik. The Tallis Scholars taldea Grammy sarietarako izendatu zuten 2001., 2009. eta 2010. urteetan. 2012ko azaroan, Josquinen «Missa De beata virgine» eta «Missa Ave maris stella» obren grabazioak Diapason d’Or de l’Année saria jaso zuen, eta, 40. Urteurrenean, Gramophone aldizkariaren Hall of Fame izenekoan hartu zuten, bozketa publiko bidez. 2015eko udaberrian, The Tallis Scholars taldeak Arvo Pärt-en musikarekin egindako disko bat atera zuen, «Tintinnabuli» izenburukoa, eta goraipamen handiak jaso zituen.
Josquinen mezen azken grabazioa («Missa Hercules Dux Ferrarie» barne) 2020ko azaroan merkaturatu zen, eta BBC Music Magazine hilabetekariaren urteko grabazioaren sari gutiziatua lortu zuen 2021ean, baita Antzinako Musikaren Gramophone saria ere, urte horretan bertan. The Tallis Scholars taldeak Josquinen heriotzaren 500. urteurrena baino lehen haren meza guztiak grabatu eta argitaratzeko zuen proiektuaren bederatzi diskoetako azkena izan zen disko hori. Gimellek ateratako azken diskoak, 2024ko azarokoak, Robert Fayrfax-en musika eskaintzen du, eta Gramophone aldizkariaren Editor ‘s Choice izenekoarekin nabarmendu zen.
