I GEMELLI

Tous les parfums du Liban
XVII. mendeko musika italiarra, Cantar de los cantares liburuan oinarritua.

Aromaz beteriko obra da Cantar de los cantares. Aroma horiek azaleratu eta jariatu egiten dira, maitasun-kantu horrek eragindako atmosfera sentsualean. Lurrina, aromak, poesia ere badira. Cantar de los cantares obrak maitasun fisiko eta espiritualarekin lotzen du aroma. Testu hori Eskritura Santuen kanonaren parte bada —bai judaismoan, bai kristautasunean—, berorren idazkerak eskaintzen dituen aukera alegorikoengatik da; izan ere, maitaleen maitasunak (sentsualitatez eta samurtasunez beteak) Jainkoak Israelekiko duen maitasuna eta Kristok Elizarekiko eta haren bila dabilen arimarekiko duen maitasuna imitatzen ditu.

Erdi Aroan, Andre Mariaren dimentsioa ere hartu zuen

Jeseren enborretik datorren makila loratua da Ama Birjina: «Kimu bat aterako da Jeseren zuhaitz-ondotik, adaxka bat erneko haren sustraietatik» (Is, 11, 1).

Loretan dagoen lorategia da Maria

Ama Birjinari lotzen zaizkion aromek haren bertuteak goratzen dituzte: liliak haren birjina-garbitasuna ekartzen du gogora, bioletak haren apaltasuna eta arrosak haren ama-karitatea.

Santen artean santena, bere aromak hedatzen ditu Igokundean: «baratze itxia» dimentsio espiritual batera igotzen da.

Errenazimentuko musikariek hainbeste konposatu badute Cantar de los cantares obra ardatz hartuta, Ama Birjina goraipatzeko izan da, neurri batean; baina baita musikaren eta aromaren arteko antzekotasunak nabarmentzeko ere, immaterialak eta hegazkorrak baitira biak, maitale mistikoen poesia lirikoak elkartuak.

XVII. mendetik aurrera, kontrapuntuaren abstrakziotik askatu ziren konpositoreak. Askapen horri esker, elkarrizketak sortzen dira, maitale bibliko horien dimentsio erotikoan sakonduz, estasi mistikoekin bat baitatoz haien bakarlari-ahotsak.

Elizan, kea eta aroma uztartzen ditu intsentsuak

Ikusgarria eta ikusezina, esperientzia sentikorra, jainkotartasunera hurbiltzen gaituena. Ama Birjinaren eta Kristoren «santu-usaina», graziaren aroma, presente dago bataioaren bidez Eliza batean elkartu diren fededunen ariman. Arimaren eta Jainkoaren arteko batasun hori Espiritu Santuaren infusioan gauzatzen da, lurretik datorren olioagatik eta haren lurrin arinagatik —Edeneko Lorategiaren oroitzapenak—.